SunStar Pampanga columnist mentions K bands

Kragi Garcia, who is by far the only Kapampangan columnist in Sun Star Pampanga who writes in Kapampangan, wrote an article citing some of the bands included in the RocKapampangan album.

Busang Basultu: Dinatang Na Mu Rin!
By Kragi Garcia
Kapisik

"NANU ing magpatalakad karing tulus a sasapu king yatu? Ninu ing mibili king batung pangsuluk ning labwad? King munag niting kayaldawan ding batwin migdalit la. At ding anak ning Guinu pepaygulisak la kingtula?" (Yob, 38:6-7)

"Ing paylaut karing dayatan makabye tula king ninu mang malsinta. Ing siwala ning dumara bubungit ya pauli ning pangarakap na king gayuma; E ku atakasan ing kekang pamalsintang sinukul kanaku." (Dalit Pamalsinta ning Laung Eyipto, S Schott)

"Ing tigtigan ya pin ing amanu ning kaladwa." (Geywang Diparan) Karetang mapilang bulan a milabas king "Dalumat" mibansagang "Ing Kasalungsungang Kabilyan ning Tigtigang Kapampangan," Setyembri 22-28, 2007 a sadya kung susulat ketang sadya kung pisulatang pipasyagan, bala mu mikurusan ku dila ngening dintang na ing kanita ku pa panayang datangna agyang mitawling bagya.

Abalitan kung mika-pangmaldang pamanigtigan la kanitang milabas a bulan deti dapot sayang e ku atagunan iti.

Makanyan man, mipayntagun a mipalabas ku kang Bise Mayor Bajun ning Masantol at atagmwan ko rening mp3 a patigtig na king PC na.

Ing amanwan ku ya pin ing malyari kung awsan Busang Batung Kapampangan o Kapampangan Pop Rock Music! Busa o Pop, Batu o Rock!

Uyta. Ating mala-grunge, ating mala-metal, ating mala-reggae, ating mala-ska, mala-blues, mala-rap at atin mu namang mala-bossa nova.

Ating masyas, ating malambut. Miyayaliwa! Malulut o makayadya no reng Kapampangan anting manigtigan bang makagawang antining tigtigan.

At ba'mu namang kaliwa karing titigtig da reng sadya ta nang darandamang antimo reng Arti Sta.Rita, Cris Cadiang, menigtigan at migdalit king "Pamalsinta Ketang Milabas" ding Sapni nang Crissot at deng papalwal nang Marc Nepo ning Kamalig (Camalig) at lakwas na reng kari Totoy Batu at kauri da.

Ing kamatutwanan ing dalumat antini migmula kanita pang mapilang pulungbanwa nang milabas dapot ngeni pa mu talagang migmulang memutaktak.

Deng amanwan kung menimuna kaniti ya pin di Isagani Ibarra bista't Tagalug ya ginamit amanu, i Papa Dom ning Tropical Depression ("Atin Ku Pung Singsing"), Romy Dizon a manigtigan pasingit Basultu king Baguio ngeni at deng Aguman Makamas a meging Miwalyan at ngeni megi na namang Julian Katarungan kebilangan da ri Norther Paras, Oliver Viray, Jason Ducut, Yul Urbina at ing manimunang talasulat/maglalang dang dalit -- i Punsigwa.

"Batalya", "Sulu", "Dale, Terak!", "Pamun Na, Ligaya", "Daya King Danum", "Mulagat", "Balen Ku" at mapilang dalit pamasku, at ding Mansuli a penimunan na ning magdalit a i Clarissa Maniego - "Tagulele nang Nelab", "Makabebe"(medalit king palage "Aring Tarik Bako Suliman" ketang banwang 2000) at "Masantol".

Minuna kareti ya pin ding Kapisik a manigtigang Kapampangan Blueskanitang pulungbanwang 1970.

Deting atlung tatawli e la man mibantug dapot atin lang makatalang pamanigtigan anting patune.

Mekad dakal la pang e mibulalag a talatigtig Kapampangan pauli ding miyayaliwang sangkan.

Matula ku at palage ku dakal la namang tumula pa king kapalyaryang ayni agya mang e la pa tune bayu uling ginamit lang andam lumang amanu o lyrics at arle pamanigtigan o musical genre a e tune Kapampangan.

Makanyan man metung nang maragul a bage iti para king Pamanigtigan Kapampangan.

Luid la reng talatigtig a makatuki: Silence -- ing mala-metal rock a pangatigtig ning "Indung Balayan"; 4th Clan -- ing mala-rap a "Dayang Kapampangan"; Amygdala -- ing mala-metal rock mu namang "Aldo ning Kekaming Kasal"; Asthma -- ing mala-blues rock a "Atin ku pung Singsing"; Istukas Over Disneyland -- ing mala-grunge/punk a "Bye Keni Yatu", ing minuna kung pepatigtig keng DWAU ketang milabas a banwa; Cyclo - ing mala-punk mu namang "Dalumdum ning Bengi"; Dialogo -- ing mala-neo reggae senayang kundimang "Atsing Rosing"; Five Against The Wall -- ing pesublyang mye mala-ska a "Sibul"; Mental Floss -- ding mala-Van Halen rock a "Lugud ning Indu" at Tibuan -- ing "Sintang Pangarap"; Mernuts -- ing panerak a mala-rhythm and blues o R and B "Aliwa Kang Talaga"; Neophytes -- ing mala-"Bohemian Rhapsody" o rock operang "Katatagan king Pamakilaban", aliwa itang ka-tigtig ne nung e dakal ya lawiwi ini inya asabi ku ita at balamu bayu ya ini at pigmulan o original ya; Nora Aunor Fans' Club -- ing mala-blues a "Kaplas" mapamyalung ya at malagu ya amanu; Pulse Rhythm -- ing inandam kang Totoy Batu -- "Saug a Malati"; Chilimansi -- ing basultung meyandam mu naman kang Totoy Batu o kabaru nang "Raffy Balboa" at pati na retang menigtigan "e misulpak" o acoustic a sayang e ko ikwa lagyu a tinigtig karing dalit mala-Bossa Novang "Abemuku" at malumane "Bulan."

Makawili la! Luid ko ngan! Balu kung datang ing panaung malyari iti kanita pa at matula kung sasalubungan ngeni! Dapot ing panayan kung tagana ya pin ing panyatang ding tigtigang tune Kapampangan a palage ku nung e la tutuknang, e la sasawa at e la susukung manintun bayung arle pamanigtigan deng talatigtig ngeni datang at datang mu rin ita.

Sana datang na ing aldo a maka-kudta lang bayung arle ning pamanigtigan deng Kapampangan at iti karandam ninu man tambing akilala nang iti Kapampangan mengari king panga-bukud ding aske ning Rock and Roll, Jazz, Blues, Reggae, Grunge at aliwa pa.

Nung agyu da't agawa reng aliwa, agawa tamu namang Kapampangan, ale? Balu ku't panwalan -- datang mu rin ing aldo ita!!!

Ssisti Mu! Ot mo reng mapilang makasake karing saken da papalwal do reng gamat da patse sisigarilyu la?

Ing balu kung pakibat da -- e de kanu buring muluk ing lub ning saken da.

Kutang: Ing sanu wari ing lakwas maulaga, ing katawan da o ing saken da?

Kasi nung sisigarilyu ka, e mu itang muluk ka asbuk nung e mikasakit ka naman at pati na reng makalele keka asangaban da ing lakwas pang makasakit a asuk niti, e wari?

Masayang aldo kapagmasusyan king Baranggay Batasan, Makabebe -- kadwa ning bulan at maligayang kadwang pulung kayaldwan kang Jayashri Govinda dasi -- kapat ning bulang kasalungsungan!

Nung atin kang munikala o sisti, malyari kang makipagtalamitan king talasulat king text o CP: 0919-6940-224 o king email: garciakragi@yahoo.com.


The RocKapampangan album is already out! Catch RocKapampangan songs being played over RW 95.1. Witness our formal launching on February 18, 2008, 5 PM, at the Holy Angel University. Infomax will also be taping a RocKapampangan special episode for their ABS-CBN Pampanga magazine show Personalan. Keep posted.